Oberland-Tour (Bärndütsch-Version)

Jedes Jahr einisch ladt üs dr Thun-Ueli is Oberland i u zeigt üs sini Heimat ufem Velo. U o das Jahr isches wider cheibe schön gsi!

 

Am Samschtig, dr 8. Ougschte hei 12 VC-Lysser/inne d'Oberlandtour unger d'Redli gno. Hübscheli simer am schöne Thunersee gäge Interlake zue. Vo Fülesee a, wos du ufe uf Aeschi isch gange, si diversi Bärgspezialischte uf u drvo..d'Abfahrt is Kandertal isch du ume im gschlossne Fäld gfahre worde. In Frutige hei mir es schatigs Terässli gfunde, wo mir super mit Ässe u Trinke versorgt si worde.

Uf dr andere Talsite isches du gäge Badheustrich u Wimmis zuegange, ar Simme na heimer du Oey  am Afang vom Diemtigtal erreicht Dür das schöne Tal simer du bis Grimmialp über es paar Seilstuffene hingere gfahre. Wo de sogar no di letschte z Rest. Eggli gfunde hei, hets ume es verdients Pöisi gä.

Z'Tal us isch du nüt vo nume nizi gsi, s'hett no zwo Schtigige gä wo üs über z'Rotbad u Bächle ume über schmali Strässli nach Oey hei bracht. Natürlech hett di schöni Holzbrügg z'Wimmis nid dörfe fähle, wo no es paar luschtegi Fötteli gmacht si worde. Dr letscht Hoger isch du dr Zwiselberg gsi, bevor mir über ume chlineri Strässli si uf Uetedorf cho.

Bi Pizza, Bier u gmüetlechem Zämesi hei mir dä wunderschön Tag la usklinge.

 

Mit liebem Gruess,

SchneeUeli

 

PS: Hoffe dir chömet ume mau is Oberlend